ජස්ලා ඉස්මත් TikTok හි රාමසාන් ආහාර වට්ටෝරු තුලින් සාම්ප්රදායිකත්වය අරුත් ගන්වයි
ආහාර මගින් ලෙඩ රෝග සුවපත් කරමින් ලෝකයට සාමය උදා කළ හැකි ලෝකයක් තිබුණේ නම්, Jazee’s recipes පිටුවේ නිර්මාතෘ Jazla Ismath එහි ප්රමුඛතවය ගනු ඇත. අප ජීවත් වන ලෝකය එතරම් පරිපූර්ණ නොවූවත්, ඇය ආදරයෙන් සහ උනන්දුවෙන් බෙදාගන්නා ආහාර වට්ටෝරු අපේ ජීවිතවලට මහත් සතුටක් ගෙන දෙන බව අරුමයක් නොවේ.
ඇයගේ Jazee’s Recipes නමැති TikTok පිටුව ශ්රී ලාංකික ගෘහස්ථ ආහාර සහ රාමසාන් සමයට උචිත රසවත් කෑම වට්ටෝරු වලින් පිරී පවතී. මුලින්ම ආහාරවල ඡායාරූප පමණක් පළ කළ ඇය, පසුව ප්රේක්ෂක ඉල්ලීම මත ඒවා සාදන ආකාරය කියා දීමට පටන් ගත්තාය. මේ වන විට ඇයගේ සරල සහ රසවත් ආහාර වට්ටෝරු ඇයගේ මුළුතැන්ගෙයින් ඔබ්බට ගොස් බොහෝ දෙනා අතර ජනප්රිය වී ඇත්තේ බොහෝ දෙනා වෙත රසවත් අත්දැකීමක් කැඳවාගෙන එමිනි. මෙම රාමසාන් සමයේ ඇයගේ අත්දැකීම් සහ ගමන් මග පිළිබඳව කතාවයි.
ජස්ලාට රමසාන් සමයේ මුළුතැන්ගෙයි කටයුතු ඉතා හැඟීම්බර අත්දැකීමකි. දවස පුරා උපවාස කිරීමෙන් පසු පවුලේ සැම එකට එකතු වී ගන්නා ‘ඉෆ්තාර්‘ ආහාර වේල ඇය දකින්නේ සුවිශේෂී තෑග්ගක් ලෙසයි. ඇය තම TikTok වීඩියෝ හරහා සුහූර් (Suhoor), ඉෆ්තාර් සහ ඊද් (Eid) උත්සවය සඳහා සුදුසු ආහාර වට්ටෝරු රාශියක් ඉදිරිපත් කරන්නේ එම සොඳුරු මොහොත ප්රේක්ෂක නිවසේදී අත්හදා බැලීමට සහය වෙමිනි.
ඇයගේ වීඩියෝවල ඇති විශේෂත්වය නම් ආහාර ඉතා රසවත් පෙනුමක් තිබුණද, ඒවා පිළියෙළ කරන ආකාරය ඉතා සරල වීමයි. ‘’ඔබේ කෑම වට්ටෝරු හරිම ඉක්මන් සහ ලෙහෙසියි’’ යනුවෙන් ඇයගේ අනුගාමිකයින් නිතර පවසන අතර, ඕනෑම අයෙකුට පීඩනයකින් තොරව ඉවුම් පිහුම් භුක්ති විඳිය හැකි බව පෙන්වා දීමට ලැබීම ඇය ලබන ලොකුම සතුටයි.
ජස්ලාට අනුව ඉවුම් පිහුම් යනු හුදෙක් ආහාර වේලක් පමණක් නොව, එය පරම්පරාවෙන් පරම්පරාවට උරුම වූ අතීත මතකයන් සමූහයකි. ඇයගේ TikTok වීඩියෝවල ඇය විසින් අලුතින් නිපදවූ කට්ලට් වැනි ආහාර මෙන්ම, ඇයගේ මිත්තණියගේ කංජි වට්ටෝරුව සහ මවගේ මුං කැවුම් වට්ටෝරුව වැනි පාරම්පරික ආහාර ද ඇතුළත් වේ.
මෙම ආහාර වට්ටෝරු දකින බොහෝ දෙනෙකුට තම කුඩා කාලයේ මතකයන් අවදි වන්නේ නිරායාසයෙනි. විදේශගතව සිටින ශ්රී ලාංකිකයින් තම මව්බිමේ රසය නැවත විඳ ගැනීමට මෙම වට්ටෝරු භාවිතා කරති. දැනට නිවුන් දරුවන් ඇතුළු දරුවන් තිදෙනෙකුගේ මවක වන ජස්ලා, තම පවුලේ වැඩකටයුතු අතරතුර මෙම වීඩියෝ නිර්මාණය කරයි. ඇයගේ සැමියා ඩිජිටල් අලෙවිකරණ උපදේශකයෙකු ලෙස Jazee’s Recipes පිටුව ප්රචලිත කිරීමට සහය වන අතර, ජස්ලා එහි නිර්මාණාත්මක පැත්ත සහ ඉවුම් පිහුම් කටයුතු සිදු කරයි.
ජස්ලාට අනුව TikTok යනු හුදෙක් වීඩියෝ පළ කරන තැනක් පමණක් නොව, එය එකිනෙකා සම්බන්ධ කරන වේදිකාවකි. ඇය ආහාර වට්ටෝරුවක් බෙදාගත් විට, එය සජීවී සංවාදයක ආරම්භය බවට පත්වේ. නරඹන්නන් වීඩියෝව නැරඹීම පමණක් නොව, තම පවුලේ පැරණි කතා සහ රාමසාන් සමයේ මතකයන් ද එහි අදහස් ලෙස බෙදා ගනිති.
ජස්ලා තම වීඩියෝ වඩාත් ආකර්ෂණීය කිරීමට ‘’රහස් වචන’’ (Secret words) වැනි ක්රම භාවිතා කරමින් නරඹන්නන් සමඟ නිතර සම්බන්ධ වේ. මේ නිසා ඇයගේ Jazee’s Recipes පිටුව, ලොව පුරා විසිරී සිටින විවිධ සංස්කෘතීන්ට අයත් පිරිස් ආහාර, ආගම සහ සම්ප්රදායන් හරහා එකිනෙකා හා බැඳෙන පොදු ස්ථානයක් බවට පත්ව ඇත.
තම TikTok පිටුව දිනෙන් දින වර්ධනය වන විට, අන්තර්ජාලය යහපත් සහ හිතකර ස්ථානයක් බවට පත් කිරීමට නිර්මාණකරුවන්ට වගකීමක් ඇති බව ජස්ලා විශ්වාස කරයි. මිනිසුන් අන්තර්ජාලය තුළ බොහෝ කාලයක් ගත කරන බැවින්, එම අවධානය යහපත් දේ සඳහා යොමු කිරීමට ඇය නිරන්තරයෙන් උත්සාහ කරයි.
ඇයගේ අනාගත අරමුණ නම්, ලොව පුරා සිටින පිරිස් එකිනෙකාට සමීප කිරීමට ආහාර පොදු භාෂාවක් ලෙස දිගටම භාවිතා කිරීමයි. ශ්රී ලාංකික ඉවුම් පිහුම් සහ රාමසාන් සම්ප්රදායන් සැමරීම දිගටම කරගෙන යාමට ඇය බලාපොරොත්තු වේ. ඇයගේ වීඩියෝ මගින් කිහිප දෙනෙකු හෝ තම පාරම්පරික ආහාර වට්ටෝරු සහ රාමසාන් උත්සවයේ සැබෑ ජීවගුණය සමඟ නැවත සම්බන්ධ වීමට පෙළඹෙන්නේ නම්, එය තමා ලැබූ ජයග්රහණයක් බව ඇගේ අදහසයි.
